DistributorNga çfarë varet hapësira
Çdo kamerë dërgon te regjistruesi një rrjedhë video me një bitrate të caktuar, të matur në Mbps. Sa më i lartë bitrate, aq më shumë hapësirë zë çdo orë regjistrimi. Bitrate varet nga:
- Rezolucioni: 4MP ka dyfish pixel të 2MP, 8MP (4K) katërfish.
- Kompresimi (codec): H.265 kërkon afërsisht gjysmën e bitrate-it të H.264 për cilësi të ngjashme. Kodekët “smart” (H.265+) e ulin edhe më shumë kur skena është e qetë.
- FPS (kuadro në sekondë): 25 FPS është lëvizje e plotë. Për shumicën e ambienteve 12–15 FPS mjaftojnë.
- Skena: një korridor i qetë kompresohet shumë më mirë se një rrugë me trafik, pemë në erë ose zhurmë natën.
- Mënyra e regjistrimit: 24/7 ose vetëm kur ka lëvizje.
Formula e thjeshtë
1 Mbps në 24 orë = 10,8 GB në ditë. Pra:
Hapësira (GB) = Mbps për kamerë × 10,8 × numri i kamerave × ditët
Shtoni rreth 10% rezervë për sistemin e skedarëve dhe për sigurinë. Mbani parasysh edhe që disku “8 TB” shfaqet në NVR si rreth 7,3 TB.
Shembull: dyqan ose zyrë me 8 kamera 4MP
8 kamera 4MP me H.265, 15 FPS dhe skenë normale: rreth 2,2 Mbps për kamerë.
- Në ditë: 2,2 × 10,8 × 8 ≈ 189 GB
- Për 30 ditë, me 10% rezervë: ≈ 6,2 TB, pra praktikisht një disk 8 TB ose dy disqe 4 TB.
Vlera orientuese për kamerë
Në 25 FPS dhe skenë normale (stream kryesor):
| Rezolucioni | H.264 | H.265 | H.265+ | GB/ditë (H.265) |
|---|---|---|---|---|
| 2MP · 1080p | 4,1 Mbps | 2,3 Mbps | 1,4 Mbps | 24 GB |
| 4MP · 2K | 6,1 Mbps | 3,4 Mbps | 2,2 Mbps | 36 GB |
| 5MP | 7,2 Mbps | 3,9 Mbps | 2,5 Mbps | 43 GB |
| 8MP · 4K | 10,2 Mbps | 5,6 Mbps | 3,6 Mbps | 61 GB |
| 12MP | 14,3 Mbps | 7,9 Mbps | 5,0 Mbps | 85 GB |
Këto janë mesatare tipike. Vlera reale varet nga modeli, lentja, ndriçimi dhe konfigurimi. Nëse e dini bitrate-in e konfiguruar në kamerë, përdoreni atë.
Si ta ulni hapësirën pa humbur cilësi
- Përdorni H.265 ose H.265+ në vend të H.264.
- Ulni FPS-të në 12–15 aty ku nuk ka lëvizje të shpejtë.
- Regjistroni me lëvizje ose me evente AI në zonat e qeta, dhe 24/7 vetëm në pikat kritike.
- Zgjidhni rezolucionin sipas qëllimit: 8MP në hyrje dhe në arkë, 2–4MP për pamje të përgjithshme.
Sa ditë regjistrimi?
Për bizneset zakonisht zgjidhen 15–30 ditë, që një incident të zbulohet dhe të kontrollohet me kohë. Objektet me rrezik më të lartë mbajnë më gjatë. Mbani parasysh që ruajtja e regjistrimeve duhet të respektojë rregullat për mbrojtjen e të dhënave personale.
Disqet dhe RAID
- Përdorni hard disqe për video-survejim, të ndërtuar për shkrim 24/7. Disqet e zakonshme të kompjuterit nuk janë projektuar për këtë ngarkesë.
- RAID 5/6 ose RAID 1 e mbrojnë regjistrimin nëse prishet një disk, me koston e një ose dy disqeve shtesë.
- Kontrolloni sa disqe mban NVR-ja dhe sa bandwidth hyrës pranon.